Home

Marculis a je une rassegne teatrâl metude impins de Pro Loco Paîs di San Marc. La volontât e je chê di proponi cheste rassegne in mût continuatîf fasintle deventâ un apontament anuâl di culture. San Marc, intai timps indaûr, al à vût un gran leam cul teatri. Di fat intai agns 50 une compagnie teatrâl za a pescjave il palc de Sale da Comunitât tirant fûr un bon sucès.
No podìn però smenteâ il toc di timp dal grup teatrâl Las Bilites che dal 1989 al 2004 al à puartât in sene cetantis comediis dal teatri classic furlan e ancje cetantis lôr rapresentazions a sfont sociâl, dutis scritis dal grup. Volint però meti impins un gnûf apontament, bisugnave cirî une peraule, un logo, une detule particolâr che a podès jessi facilmentri ricuardade e che a riclamàs le culture, il teatri, il cjatâsi insiemi. Il nestri amì Claudio Moret nus à dât la ispirazion, sgarfant fûr cheste peraule furlane. Marculis par furlan a son capriolis, zirevoltis, ma no dome. Chest tiermin nus rimande a antighis pratichis sacris, in ûs te nestre regjon, che a cjapin dentri la danze, la musiche e la rapresentazion teatrâl. Cierts studis a coleghin la etimologjie de peraule al evangjelist San Marc. In some, la peraule juste, la peraule che i stavin cirint!
E alore… Marculis!