Marculis 2017

La rassegne teatrâl si je davuelte intal mês di Març. Chi in bande o metin la locandine. Come prime edizion je lade plui di ben: la nestre Sale de Comunitât je stade jemplade in ognidun dai apontaments e nô de organizazion o vin vût pardabon cetante braûre. O proponin vie indenant, la biografie di ogni singule compagnie e un struc da opare che a àn puartât in sene. La rassegne je stade inmaneade da Pro Loco Paîs di San Marc, cun il patrocini dal Comun di Merêt di Tombe e da l’ARLef. La manifestazion a faseve part des iniziativis dal Tavolo delle Associazioni, simpri dal Comun di Merêt di Tombe.

 

Teatro Incerto

Il Teatro Incerto al nas intal 1982 a Grediscje di Sedean (UD). Po dopo vê frecuentât cetancj cors di Tecniche dal Moviment, Dizion e fonetiche, ricercje dal propri personaç comic, acrobatiche e metût impins i prins spetacui dedicâts par principi a la figure dal clown, cualchidun dai soi components, intal 1986, a àn la oportunitât di frecuentâ la Scuele Irfop, par atôrs, Fare Teatro, inmaneade dal Centri Servizis e Spetacui di Udin – Teatri Stabil di Inovazion dal FVG. Intal 1989 a cjapin il diplome. Jenfri i lôr mestris, insegnants e regjiscj a van ricuardâts Elio De Capitani, Massimo Navone, Gigi Dall’Aglio, Giuseppe Bevilacqua, Marco Baliani, Rita Maffei. In trentecuatri agns di ativitât a àn fat spetacui moltepliçs; a van visâts Le Scarpe prendono Piede cun plui di 500 replichis, la trilogjie Four – Laris – Dentri, Forest, Don Chisciotte, Garage 77, Predis, In cunfin di vite, S-glaçât. La golaine Per il Teatro e la cjase editore KappaVu e àn publicât diviers lôr tescj teatrâi. A àn vinçût il premi Valle D’Aosta al Festival dal Libri di Turin (2005) cun il test Isoke. A àn une menzon speciâl al premi Moret d’Aur e un altri ricognossiment al Premi Candoni pal test Une Piçule robe. A àn recitât in ogni cjanton dal Friûl, in diviersis localitâts talianis, europeanis e ator par il mont. Rai Regjon, Telefriuli e Libare Tv a àn mandât in onde lis regjistrazions di cualchi lôr rapresentazion. A àn lavorât a Radio Onde Furlane e Radio Rai e fat plui di 500 spots publicitaris. A àn colaborât cun varis Ents, la Universitât di Udin e la Academie Civiche Teatrâl Nico Pepe.

Predis

“Ogni frut che al nas nus ricuarde che Dio nol è ancjemò strac dai oms”. Tra lis primis batudis di Predis, chest aforisim tant biel di Tagore al devente il messaç che ator di chel si davuelç la vicende che e viôt protagoniscj trê oms daûr une puarte. Trê predis intune sale di spiete. Fin chi nuie di strani, se nol fos che la puarte da sale lì che a son daûr a spietâ e je chê di un repart di ostetricie. La parturiente e je une femine che, par diviers motîfs, al sta tant a cûr a ducj i trê: une imigrade che lôr a àn dât acet e aiût cussì che jê a podès metisi dentri intal intal tiessût sociâl. Ma ce che al fâs i trê predis ancjemò plui partecips a chest moment legri, al è il fat di no savê cui che al è il pari dal frut che al sta par nassi. E al è par chest che, cun lizerece, a tirin sù di se il rûl di paris tenars, preocupâts, amorevui. Sintiments che ju puartin a fâ i conts cu lis mormorazions di cualchi parochian, cun i prejudizis, ma soredut cui lôr dubis, cul lôr stes bisugn di jessi parìs. In spiete de clamade il timp si ferme: e sarà une lungje gnot. Nadâl al aromai dongje. Il lûc là che a spietin al devente spazi de anime: l’ospedâl si fâs desert, labirint, cîl stelât. E a rivin messaçs misteriôs che a invidin il trê a metisi a cjaminâ. Cu la lizerece inconfondibil des comediis dal Teatro Incerto, Predis al è soredut regâl a chei predis che si cjatin a vivi lis lôr piçulis grandis bataiis bessôi, inte indiference, dismenteâts e ridûts di un mont che, cemût che al diseve David Maria Turoldo, “nol perdone ai predis”.

Compagnie Filodramatiche Sot la Nape di Vildivar

Nassude intun prin moment inte suaze de parochie dal paîs, la Compagnie filodramatiche Sot la Nape si è dade dongje cun at uficiâl tal 1975, svantant vuê cuarante agns di storie e di ativitât teatrâl amatoriâl. Tai agns indaûr, di là des rapresentazions in ambit locâl e provinciâl, no je mancjade ocasion di slargjâ il propri rai di azion tal teritori regjonâl o in piçui fogolârs furlans (Torin, Milan, Latine, etc.), smirant a valorizâ e a mantignî tant che caratar principâl la componente de lenghe furlane. Dulinvie dai agns cetantis personis a son jentradis tal grup, si è rivât adore a tocjâ diviers gjenars di public e a son stadis metudis in sene tantis comediis: I Ruspiôs, La cjase gnove (tescj voltâts par furlan di origjinâi di Goldoni), Il punt da la Silvie e Trè matèz e par un anel (tescj di Paola Tubaro, regjie di Luciano Rocco), e Lis disgrazis a van come i fraris – mai solis (tescj di Luciano Rocco, regjie di Lindo Pagura), La partide dal vinars (liberamentri voltât in furlan di bande di Paola Tubaro, da “La strana coppia” di Neil Simons), e la inedite Eline (adatament in furlan par opare di Paola Tubaro di une des ultimis produzions di Luciano Rocco, cun regjie di Alex Campagner). Tal 2011 e à debutât cu la comedie Siet Nininis… Sassinis (libare interpretazion di “Otto simpatiche donnette” di Salvin Lorefice), cu la regjie di Claudio Mezzelani. Daspò, tal 2013 al è stât fat Ce comediis chest Nadâl!, comedie brilante cun regjie interne che e smirave a cjapâ dentri i atôrs zovins jentrâts inte compagnie. Tal 2014 al è stât metût in pîts il spetacul Vôs di Friûl. Storie de Patrie in divise, ispirât ae storie de tiere e de int furlane. L’ultin spetacul dal grup, Dal 7 al 9, cu la regjie di Claudio Moretti, al à debutât al principi dal 2017.

Dal 7 al 9

Cuatri amiis si cjatin ogni an tal stes puest pe fieste dai 8 di Març. Cuatri amiis cressudis insiemi e che insiemi a àn condividût lis gjondis, i dolôrs, i siums e i plasês de vite: Vanda, femine di sucès cuntune inviade cariere politiche, Marilù, atore trative cjapade des gjondis de maternitât, Teresa, assistente sociâl impegnade tal cjamp dal volontariât e Antonella, la miôr di dutis… aromai pierdude par colpe dal om. Ma ce sucedial se Teresa e lasse lis clâfs dal apartament di Vanda a un carcerât e ex-drogât, se Guido, l’amì di infanzie, al rive in visite, trus e malvignût come simpri, e se Michela, la incuiline dal plan parsore e barufe cul morôs? Une comedie in doi ats, a colps di ridadis e zigadis, tra batudis, freçadutis e imbascj no spietâts.

Grup Ricreatîf Drin e Delaide

Il Grup ricreatîf Drin e Delaide al nas intal lontan 1975 cu la sacre rapresentazion dal Vinars Sant clamade Giudeos. Inte sere dal Vinars Sant la Passion di Jesù Crist e ven rapresentade cun varis cuadris che si corin daûr dilunc de procession pes viis dal paîs. Intal 1977 al puarte in sene la prime rapresentazion teatrâl pe regjie di Vittorio Valentinis: autôr regjist e animadôr dal grup. Fin a vuê, la compagnie e à puartât in sene diviersis oparis di Moliere a Barillet e Gredy Balzac, Bobrick e Clark e varis autôrs furlans. Intai tancj concors li che e àn partecipât, il grup al à vint 19 premis. Di dodis agns, il grup al organize cun il Comun, une rassegne di dîs spetacui che à va di Novembar a Avrîl.

La cjamare dai mateç

O cjapais un vendidôr di machinis apassionât dal so lavôr, un dentist apassionât des feminis che a frecuentin il so studi e une femine… apassionade! Zontait che la femine e je la femine dal vendidôr e che la stesse e je in cure dal dentist. I disvilups a son di podê intuî, ma cheste comedie brilante e fronte i temis dal triangul classic in un mût no scontât. O viodarìn trê moments distints intal timp di chest menage e tra batudis fulminantis, situazions sureâls, disposizions maliziosis e azions inspietadis, i trê personaçs si contindaran la vuestre benvolence. Une comedie brilante classiche dulà che la atenzion dal regjist e je focalizade sul ritmi e su la voie di divertîsi dai interpretis. Particolaritât de preparazion e je la presince di dôs atoris cun personalitâts diviersis che si alternaran inte part de protagoniste costrenzint cussì i interpretis oms a recitâ adeguantsi al personaç costruît di une o di chê altre. Il risultât a son dôs comediis similis ma no compagns. Il spetatôr che lu volarà al podarà assisti a plui di une repliche e zontâ divertiment a divertiment scuvierzint lis diviersis sfumaduris des interpretazions.