Marculis 2018

La rassegne teatrâl si e davuelte intal mês di Març. Come simpri chi in bande o metin la locandine. Il sucès dal an prime al è stât riconfermât. Al è stât un biel viodi la nestre Sale de Comunitât jemplâsi vie in dilunc di ognidun dai apontaments. Vie indenant o podeis cjatâ la biografie di ogni singule compagnie e un struc da opare che a àn puartât in sene. Come l’an prime, la rassegne je stade inmaneade da Pro Loco Paîs di San Marc, cun il patrocini dal Comun di Merêt di Tombe e da l’ARLef. La manifestazion a faseve part des iniziativis dal Tavolo delle Associazioni, simpri dal Comun di Merêt di Tombe.

 

 

Teatro Incerto

Il Teatro Incerto al nas intal 1982 a Grediscje di Sedean (UD). Po dopo vê frecuentât cetancj cors di Tecniche dal Moviment, Dizion e fonetiche, ricercje dal propri personaç comic, acrobatiche e metût impins i prins spetacui dedicâts par principi a la figure dal clown, cualchidun dai soi components, intal 1986, a àn la oportunitât di frecuentâ la Scuele Irfop, par atôrs, Fare Teatro, inmaneade dal Centri Servizis e Spetacui di Udin – Teatri Stabil di Inovazion dal FVG. Intal 1989 a cjapin il diplome. Jenfri i lôr mestris, insegnants e regjiscj a van ricuardâts Elio De Capitani, Massimo Navone, Gigi Dall’Aglio, Giuseppe Bevilacqua, Marco Baliani, Rita Maffei. In trentecuatri agns di ativitât a àn fat spetacui moltepliçs; a van visâts Le Scarpe prendono Piede cun plui di 500 replichis, la trilogjie Four – Laris – Dentri, Forest, Don Chisciotte, Garage 77, Predis, In cunfin di vite, S-glaçât. La golaine Per il Teatro e la cjase editore KappaVu e àn publicât diviers lôr tescj teatrâi. A àn vinçût il premi Valle D’Aosta al Festival dal Libri di Turin (2005) cun il test Isoke. A àn une menzon speciâl al premi Moret d’Aur e un altri ricognossiment al Premi Candoni pal test Une Piçule robe. A àn recitât in ogni cjanton dal Friûl, in diviersis localitâts talianis, europeanis e ator par il mont. Rai Regjon, Telefriuli e Libare Tv a àn mandât in onde lis regjistrazions di cualchi lôr rapresentazion. A àn lavorât a Radio Onde Furlane e Radio Rai e fat plui di 500 spots publicitaris. A àn colaborât cun varis Ents, la Universitât di Udin e la Academie Civiche Teatrâl Nico Pepe.

Çurviei Scjampâts

Il simpri vert trio dal Incerto si met in zûc sperimentant la comutazion da la performance radiofoniche cun chê teatrâl. Cheste volte, dopo la cetant furtunade serie di “Çurviei scjampâts”, lade in onde su Radio Spazio cul contribût da l’Arlef, il Teatro Incerto al va fûr dai studis di regjistrazion e al puarte in teatri une sielte tra lis cincuante trasmissions, trasformantlis intun talk-show. Il spetacul, come la trasmission par radio, al è tal stîl dal Teatro Incerto: divertent, sarodin, sfaçât, demenziâl, ma che nol bandone chê analisi sociâl sutîl che a caraterize la lôr comicitât.

I Baracons

Il grup teatrâl “I BARACONS” al è nassût a Basilian ai 25 di Novembar dal 1996. Subit si è metût in evidence par vê metût adun spetacui in furlan su sogjets elaborâts al so interni. Dut al scomence intal 1997 cuntun spetacul par fruts, La bachete magjiche. Dal stes an jê la comedie ironiche Puars e Mats che a conte di un grup di personis che a passin di un moment di inlusorie ricjece a moments di puaretât. Dal 1998 invezit al jê la opare Amôr ta vuere, une rapresentazion multimediâl che a met in sene lis letaris di doi nuviçs che si scrivin in timp de vuere dal 15-18, mostrant dute la scletece e i sintiments che a vegnin fûr dai lôr scrits. Simpri intal 1998 a metin in sene Si fâs par mût di dî , une comedie che a met in mostre virtûts e pecjis des fameis di une volte intune famee patriarcjâl. Dal 1999 jê la comedie No vin nuie di pierdi e intal 2001 la compagnie a met in sene Ocjo a la scjarnete, une comedie tirade fûr di une storie popolâr. An rapresentât àn Vie in dilunc pal 2002, I Baracons a metin in pîts une famose opare di Gianni Gregoricchio, La cjase sul cjanton. Intal 2005 je la volte di La speziarie Venturin che a conte la storie da zovine Bice restade vedue cuntune frute piçule e il negozi di tirâ indenant. Altris comediis in lenghe furlane a vegnin rapresentadis: Dome cjacares? (2008), La nestre vile (2010) e Joi joi se sa me mari (2013). Intal 2015 a metin in sene Cheste volte e je lade struncje, une comedie ambientade intal studi di un miedi. Dal 2018 jê la comedie Cuatri pas pal Friûl, piçulis contis ambientadis in lûcs diferents dal Friûl. Il grup al cîr di mantignî vive la lenghe furlane tal so teritori, di propagandâle ancje ator e di fâ cognossi cemût che si viveve une volte, lis vieris usancis, i mûts di dî aromai dismenteâts, par che la int, soredut i zovins, no si dismentein des lôr lidrîs.

Cuatri pas pal Friûl

In sîs curts tocs teatrâi, la Compagnie nus puarte ator par propit sîs paîs dal Friûl, par fânus gjoldi e gustâ lis carateristichis di ogni lûc. Da basse fin ae montagne, cence smenteâsi da zone culinâr di mieç. La alternance dai atôr, vie in dilunc de recitazion, a môf la sene, juste par gjavâ fûr cualchi ridade al public.

Travesio Tutto Teatro

La compagnie teatrâl TravesioTuttoTeatro je nassude trente agns indaûr, metint in pîts piçulis gags in furlan che a vignivin rapresentadis simpri ai 26 di Dicembar in ocasion di une racuelte ufiertis pe scuele de infanzie. Sot la vuide di un regjist e po dopo jessi associâts a ATF, la compagnie a scomençât a rapresentâ comediis de tradizion furlane classiche, oparis di Maria Gioitti Del Monaco e Guido Michelutti (Une sblancjade di Pasche, Lis Racladis, Napoleons tal Cormor). La colaborazion cun Luciano Rocco invezit, à fat nassi il spetacul Il condot intal’ort, cu la regjie di Michela Passatempo, cetantis voltis replicât. Simpri cun Michela Passatempo, e po dopo cun Andrea Chiappori, la compagnie à recitât La gambiâl di Roberto Ongaro, e Mai cjalâ lis aparincis, scrite dome par TravesioTuttoTeatro. Intal 2010 e intal 2014, TravesioTuttoTeatro al rapresente dôs comedis scritis di un component dal grup Fufignis di pais e Ma tu di ce bande statu?, sot la regjie di Tommaso Pecile, miôr cognossût par la produzion Felici Ma Furlans.

Gildo

New York, fin dai agns ‘20. Meni Cecon al è un emigrant furlan che al à fat fortune: lant daûr dal sium american al è deventât un industriâl di sucès. Ma chest nol pues difindilu di ce che al stâ par scjadenâsi in cjase: une valîs plene incolmenade di zoiis che a cambie simpri di man, un berdei di fiis ilegjitimis ognidune cul so spasimant. Par Siôr Meni i fastidis a son a pene scomençâts.