Marculis 2019

Us spietin ae gnove edizion de rassegne teatrâl Marculis 2019. Come simpri chi in bande o metin la locandine. Vie indenant o podeis cjatâ la biografie di ogni singule compagnie e un struc da opare che a puartaran in sene. La rassegne je stade inmaneade da Pro Loco Paîs di San Marc, cu la colaborazion de Associazion Culturâl La Grame. Il patrocini al è simpri dal Comun di Merêt di Tombe e da l’ARLef. La manifestazion à fâs part des iniziativis dal Tavolo delle Associazioni, simpri dal Comun di Merêt di Tombe.

 

 

FACCHIN SHOW Live

Dopo i sucès di FELICI ma furlans (premi dal public dal Roma Web Fest 2014 e BEST ENSEMBLE AWARD dal Bilbao Web Fest 2015) e di TACONS (deventât un fenomen mediatic cun plui di 1.000.000 di visualizazions in gracie a l’iconic mestri Luciano Lunazzi) une gnove serie e nas de farie des ideis di Alessandro Di Pauli e Tommaso Pecile: FACCHIN CENTER. La serie, une parodie dai talk-show di cumò, insiorade cun servizis fat in esterni, reportage, e televenditis, si disvilupe in trê episodis, ognidun di 30 minuts, che a frontin tematichis che a brusin su la furlanetât. In direte dal FACCHIN THEATER la dotoresse a intervistarà esperts e personis comunis, e lis metarà a lis curtis cu la sô razionalitât demenziâl.

Compagnie Filodramatiche Sot la Nape

La Compagnie e nas cun at uficiâl tal 1975, svantant vuê cuarante agns di storie e di ativitât teatrâl. Tantis lis comediis metudis in sene. Ricuardin I Ruspiôs, La cjase gnove, Il punt da la Silvie, Trê matèz par un anel, La foghère. Dal 2011 je la comedie Siet Nininis… Sassinis, cu la regjie di Claudio Mezzelani, dal 2013 Ce comediis chest Nadâl!, e dal 2014 Vôs di Friûl. Storie de Patrie in divise. Intal 2017 a puartin in sene Dal 7 al 9, cu la regjie di Claudio Moretti. E simpri Moretti al met la firme su la regjie de comedie di usgnot.

News in the gnot

“A jere une gnot scure e di tampieste…”. A scomence cussì cheste storie, come inte miôr tradizion dal zâl. Ma prest da tension si passe ae ridade. Tirât fûr da Feu la mère de Madame di G. Feydeau, chest spetacul si ispire ae inzegnositât e ae scriture comiche dal autôr. L’om al vîf la sô cuotidianitât jenfri lavôr, passions artistichis e lungjis seradis cui amîs. La femine invezit je simpri di plui sfinide da l’assince dal om, tant di meti impins une amicizie cun la camarele di vere complicitât. Cheste aparint mènage al passe bot e sclop in secont plan cuant che, a sorprese, si sint tucâ ae puarte intal scûr de gnot. Un zovin al è di fat incjariât di puartâ une gnove che a fâs scaturî. La fin a sarà inspietade.

I Sghiras

I Sghiras, che voltât par talian al vûl dî Gli scoiattoli a nassin intal 2003 cun la comedie Il paîs al è piçul e la int a cjacare. Chest batisim al va a pari cu la prime jessude publiche dal grup. Ma stabilî une vere e proprie date di nassite da compagnie al è dificil. Dut al è scomençât cuant che cualchi mame, par fâ contents i fruts de scuele materne e àn decidût di meti in sene des flabis. E cussì, la passion pe recitazion à puartât il grup a no bandonâ la ativitât. L’intindiment de Compagnie al è chel di fâ dismenteâ ducj i piçui e grancj problemis di ogni dì, ancje se dome pal timp dal spetacul. Se dopo si rive a fâlu cuntune ridade, salacor a plene panze, ancjemò miôr.

La murose di Triest

La comedie a conte un episodi che si davuelç intun cualsisei paîs dal nestri Friûl, ambientât cualchi an dopo de fin de seconde vuere mondiâl. La storie a cjape ispirazion da cognossude diference di viodudis tra il furlan e il triestin. Dut chest al puarte a incomprensions, barufis, fraintindiments e moments di tension tra femine, om, gjenitôrs, fîs e altris personaçs. Ma come che al sucêt in chestis storiis, un biel finâl al met dut a puest.